ကြွက်နားရွက်မှိုစိုက်ထုပ်များကို လေပြင်းတိုက်ခတ်မှုမရှိပဲ လေဝင်လေထွက်ကောင်းမွန်၍ နေတိုက်ရိုက်မပူသော အစိုဓါတ်ကောင်းမွန်သည့် နေရာများ၊ နေအိမ်တိုက်ခန်းများတွင် အလွယ်တကူစိုက်ပျိုးနိုင်ပါသည်။
ကြွက်နားရွက်မှိုစိုက်ထုပ်စိုက်ပျိုးမည်ဆိုပါက လိုအပ်သောအပူချိန်မှာ (၂၅˚-၃၂˚)စင်တီဂရိတ် ဖြစ်ပြီး စိုထိုင်းဆမှာ (၈၀-၉၅)% ရရှိရန် လိုအပ်သည်။ မှိုထုပ်ဘေးပတ်လည်တွင် (၁-၂) လက်မ အရွယ်ဓါးရာ(၈)ချက်နှင့် အထုပ်အောက်ဘက်တွင်(၂)ချက် စုစုပေါင်းဓါးရာ(၁၀)ချက်ပေး၍ ရေချိုးခန်းနှင့် အစိုဓါတ် ရရှိသည့်တို့တွင် တန်းထိုး ချိတ်ဆွဲကာ အလွယ်တကူစိုက်ပျိုးနိုင်ပါသည်။
မှိုမျိုးထုပ်များကို နေ့စဉ်ရေပန်းခရား၊ ရေခွက်ဖြင့် တစ်နေ့လျင် အနည်းဆုံး (၂)ကြိမ် ရေလောင်းပေး ရပါမည်။ ကြွက်နားရွက်မှိုစိုက်ပျိုးရာတွင် အစိုဓါတ်ကောင်းမွန်ရန် အထူးလိုအပ်ပါသဖြင့် အစိုဓါတ် မပြတ်စေရန် ဂရုပြုဆောင်ရွက်ရပါမည်။
မှိုထုပ် စဖွင့်ပြီး (၄-၆)ရက်တွင် မှိုပွင့်ငယ်ကလေးများ ထွက်ပေါ်လာ ပြီး ဆက်လက်ကြီး ထွား၍ မှိုပွင့်နှုတ်ခမ်းသားများ တွန့်လာသောအခါ ဆွတ်ခူးရန်အသင့်ဖြစ်ပါသည်။ ဆွတ်ခူးရာတွင်လည်း အောက်ခြေမှ လက်ဖြင့်ညင်သာစွာနုတ်ယူပါ။ ချိုးဖဲ့ဖြတ်တောက်၍ မယူရပါ။
မှိုဆွတ်ခူးပြီးတိုင်း ရေ(၂)ရက်ခန့် ဖြတ်ထားပြီး ရေပြန်လောင်းခြင်းဖြင့် ဒုတိယအကြိမ် မှိုပြန် ထွက်လာပါသည်။ ထိုနည်းအတိုင်း ဆွတ်ခူးခြင်း၊ ရေဖြတ်ခြင်း ပြုလုပ်ပေးပါက မှိုထုပ်များကို အနည်းဆုံး (၂လမှ၂လခွဲ) ကြာသည်အထိ (၃-၅) ကြိမ် ဆွတ်ခူးစိုက်ပျိုးနိုင်ပါသည်။ (၆၀)ကျပ်သား ရှိသော မှိုစိုက်ထုပ်(၁)ထုပ်မှ မှိုအလေးချိန် (၂၀-၂၅) ကျပ်သား ရရှိနိုင်ပါသည်။
ကြွက်နားရွက်မှိုသည် ဗိုင်းရပ်စ်ရောဂါကာကွယ်ခြင်းနှင့် ကိုယ်ခံအားမြှင့်တင်နိုင်သော အာနိသင်များအပြင် သွေးကြောအတွင်း သွေးခဲမှုကို ကာကွယ်ပေးခြင်း၊ နှလုံးရောဂါကို ဟန့်တားနိုင် ခြင်းနှင့် အသားအရည်ချောမွေ့စေခြင်း စသည့်အာနိသင်များလည်း ရှိပါသည်။
မှို စိုက်ပျိုးရေးအတွက် လိုအပ်သော နည်းပညာ အကြံဉာဏ်များကို နီးစပ်ရာ စိုက်ပျိုးရေးဦးစီးဌာနရုံးများတွင် လည်းကောင်း ၊ စိုက်ပျိုးရေး Call Center ၏ Hot Line ဖုန်းနံပါတ် 01-2399555 ၊ Viber 09764000841 တို့တွင်လည်းကောင်း ဆ က်သွယ် မေးမြန်းနိုင်ကြပါသည်။
