လျှာနာ ရောဂါ ကာကွယ်ဆေးဝါးထုတ်လုပ်ရေးစက်ရုံ ပန္နက်တင် ၂၀၂၀ ခုနှစ် ဇူလိုင်လတွင် ပြီးစီးမည်

​ မွေးမြူရေးနှင့်ကုသရေးဦးစီးဌာန ၊ ခွါနာ လျှာနာ ရောဂါကာကွယ်ဆေးဝါး ထုတ်လုပ်ရေး စက်ရုံ ပန္နက်တင် အခမ်းအနားကိုဇွန်လ ၂၂ ရက် နံနက် ၉ နာရီအချိန်က ရန်ကုန်မြို့၊ အင်းစိန်မြို့နယ်ရှိမွေးမြူရေးနှင့်ကုသရေးဦးစီးဌာန ရုံးဝန်းအတွင်း၌ ကျင်းပရာစိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာအောင်သူ၊  ပြည်ထောင်စုသမ္မတ မြန်မာနိုင်ငံတော်ဆိုင်ရာ ဂျပန်နိုင်ငံသံအမတ်ကြီး H.E Mr. Ichiro MARUYAMA ၊JICA , Chief Representative Mr. Masayuki KARASAWA ၊ လွှတ်တော် ကိုယ်စားလှယ်များ၊ အမြဲတမ်းအတွင်းဝန် ဒေါက်တာခင်ဇော်၊ညွှန်ကြားရေးမှူးချုပ် ဒေါက်တာရဲထွန်းဝင်း ၊ YAMASHITA SekkeiCM and TAKENAKA Corporation မှ ကိုယ်စား လှယ်များ တက်ရောက် ကြသည်။

အခမ်းအနားတွင် ပြည်ထောင်စုဝန်ကြီး ဒေါက်တာအောင်သူ နှင့် ဂျပန်နိုင်ငံ သံအမတ်ကြီး တို့က အဖွင့်အမှာစကားများ ပြောကြားကြပြီး၊ စီမံကိန်းဒါရိုက်တာ က ခွါနာ လျှာနာ ရောဂါ ကာကွယ်ဆေးဝါးထုတ်လုပ်ရေး စက်ရုံ တည်ဆောက်မှုလုပ်ငန်းဆိုင်ရာများ ကို ရှင်းလင်းတင်ပြသည်။

ထို့နောက်  ပြည်ထောင်စုဝန်ကြီး၊ ဂျပန်နိုင်ငံသံအမတ်ကြီး၊အမြဲတမ်းအတွင်းဝန် နှင့် တာဝန်ရှိသူများက ခွါနာလျှာနာရောဂါကာကွယ်ဆေးဝါး ထုတ်လုပ်ရေး စက်ရုံ တည်ဆောက် မည့် သတ်မှတ်နေရာများတွင် ပန္နက်တင်မင်္ဂလာကိုဆောင်ရွက်ကြသည်။

မြန်မာနိုင်ငံသည် အရှေ့တောင်အာရှနိုင်ငံများတွင် တိရစ္ဆာန်အရင်းအမြစ်ပေါများသော နိုင်ငံတစ်နိုင်ငံ ဖြစ်သည်နှင့်အညီ တိရစ္ဆာန်ရောဂါကာကွယ်ထိန်းချုပ်ရေး လုပ်ငန်းများကို အထူးဂရုပြုဆောင်ရွက်လျက်ရှိပြီး နှစ်စဉ် အနည်း နှင့်အများ ဖြစ်လေ့ ဖြစ်ထရှိသည့် ခွါနာလျှာနာ ရောဂါ ကာကွယ်ရေးလုပ်ငန်းများကိုလည်း မိမိတို့ဌာန က စနစ်တကျဆောင်ရွက် လျက် ရှိသကဲ့သို့ အပြည်ပြည်ဆိုင်ရာအဖွဲ့အစည်းများ၊ ဖွံ့ဖြိုးမှု မိတ်ဘက် အဖွဲ့အစည်းများနှင့် ပူးပေါင်းဆောင်ရွက်ခဲ့သည်မှာ ၅ နှစ်ကျော်ခဲ့ပြီဖြစ်ကြောင်း၊ ကမ္ဘာ့တိရစ္ဆာန်ကျန်းမာရေးအဖွဲ့ က ခွါနာ လျှာနာ ရောဂါ အဖြစ်များသည့် မြန်မာနိုင်ငံ အလယ်ပိုင်းဒေသများရှိ မြို့နယ် ၂၄ မြို့နယ်တွင် ရောဂါကာကွယ်ထိန်းချုပ်ရေးလုပ်ငန်းများ ဆောင်ရွက်နိုင်ခဲ့သဖြင့် ရောဂါဖြစ်ပွား နှုန်း လျော့ကျသွားသည်ကိုတွေ့ရှိရကြောင်း၊ အဆိုပါရောဂါသည် ကူးစက်လွယ်ရောဂါဖြစ်ပြီး ခွါနာ လျှာနာဖြစ်ပြီးသည့် ကျွဲ နွားများသည် လယ်ယာလုပ်ငန်းခွင်တွင် နှစ်ကာလတစ်ခုအထိ အသုံး ပြု၍မရနိုင်သဖြင့် တောင်သူများအတွက် ထိခိုက်မှုများကြုံတွေ့ရပါကြောင်း၊ သို့ပါ၍ ခွါနာ လျှာနာရောဂါ တားဆီးကာကွယ်ရေးသည် ကျေးလက်နေပြည်သူများ၏ လူမှုစီးပွားကို များစွာအထောက်အကူပြုသည့်လုပ်ငန်းဖြစ်ကြောင်း         မွေးမြူရေးနှင့်ကုသရေးဦးစီးဌာန ၊ ညွှန်ကြားရေးမှူးချုပ် ဒေါက်တာရဲထွန်းဝင်း က ပြောသည်။

ယနေ့ကျင်းပပြုလုပ်သော ပန္နက်တင်ဆောင်ရွက်သည့် ခွါနာ လျှာနာ ရောဂါ ကာကွယ်ဆေးဝါးထုတ်လုပ်ရေး စက်ရုံသည် Roller bottle culture method အသုံးပြုပြီး တစ်နှစ်လျင် ကာကွယ်ဆေးတစ်သန်းထုတ်လုပ်နိုင်မည်ဖြစ်ပြီး အဆိုပါစက်ရုံတည်ဆောက် ခြင်း နှင့် ဓါတ်ခွဲခန်းသုံးပစ္စည်းကိရိယာများ အတွက် ဖွံ့ဖြိုးတိုးတက်မှုအကူအညီအထောက်အပံ့အဖြစ် ဂျပန်ယန်း ၁၄၁၇ သန်း ကို ဂျပန်နိုင်ငံအစိုးရကကူညီပေးခြင်း ဖြစ်သည်။

ခွါနာ လျှာနာ ရောဂါ ကာကွယ်ဆေး ပိုမိုထုတ်လုပ်ပေးခြင်းနှင့်ရောဂါရှာဖွေရေး ဓါတ်ခွဲခန်းလုပ်ငန်းများ တိုးတက်မြင့်မားလာစေခြင်းမှတဆင့် မြန်မာနိုင်ငံတွင် ခွါနာ လျှာနာ ရောဂါ ဖြစ်ပွားမှုကို ထိန်းချုပ်လာနိုင်စေပြီး စိုက်ပျိုးမွေးမြူရေးလုပ်ငန်းများ ပိုမိုဖွံ့ဖြိုးလာ စေရန်ရည်ရွယ်ဆောင်ရွက်သော ယခုတည်ဆောက်ရေးစီမံကိန်းကို ၂၀၂၀ ခုနှစ်ဇူလိုင်လ တွင် ပြီးစီးအောင် ဆောင်ရွက်သွားမည်ဖြစ်ကြောင်း သိရှိရသည်။