ပြည်ထောင်စုအဆင့်သတင်း သတင်းကဏ္ဍ

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဖလား ဌာနပေါင်းစုံ ကြက်တောင်ရိုက် အားကစားပြိုင်ပွဲ ဆုချီးမြှင့်ပွဲ ကျင်းပ

 

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဖလား ဌာနပေါင်းစုံ ကြက်တောင်ရိုက်အားကစားပြိုင်ပွဲ နောက်ဆုံး ဗိုလ်လုပွဲ နှင့် ဆုချီးမြှင့်ပွဲ အခမ်းအနားကို ဩဂုတ်လ (၁၂)ရက်နေ့ ညနေပိုင်း က ပျဉ်းမနား ပေါင်းလောင်း အားကစားခန်းမ ၌ ကျင်းပပြုလုပ်ရာ အခမ်းအနား သို့ ပြည်ထောင်စုဝန်ကြီး ဦးတင်ထွဋ်ဦး ၊ အမြဲတမ်းအတွင်းဝန် ဦးကျော်မင်းဦး နှင့် ဦးစီးဌာနများမှ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ ၊ အရာထမ်းအမှုထမ်းများ၊ အားကစားနှင့်ကာယပညာဦးစီးဌာန မှ အကဲဖြတ် ဒိုင်များ အဖြစ် တာဝန်ယူဆောင်ရွက်ပေးခဲ့ကြသည့် အားကစား ပညာရှင်များ နှင့် ဦးစီးဌာနအလိုက် နိုင်ငံဝန်ထမ်း ကြက်တောင်ရိုက် အားကစားအသင်းများ တက်ရောက်ကြပြီး စိုက်ပျိုးရေးတက္ကသိုလ် အသင်း နှင့် မွေးမြူရေးနှင့်ကုသရေးဦးစီးဌာနအသင်းတို့ ၏ နောက်ဆုံးဗိုလ်လုယှဉ်ပြိုင်ကစားပွဲကို ကြည့်ရှုအားပေးကြသည်။

       ထို့နောက်ဆုပေးပွဲကို ဆက်လက်ကျင်းပရာ ပြည်ထောင်စုဝန်ကြီး က တံခွန်စိုက် ဆုဖလား ရရှိသည့် စိုက်ပျိုးရေးတက္ကသိုလ် ကိုယ်စားပြု ကြက်တောင်ရိုက် အားကစားအသင်း ကို လည်းကောင်း၊ တစ်ဦးချင်းဆုများ နှင့် အသင်းလိုက်ဆုများကို အမြဲတမ်းအတွင်းဝန် နှင့် ညွှန်ကြားရေးမှူးချုပ်များ က လည်းကောင်း ဂုဏ်ပြုဆုများ အသီးသီး ပေးအပ်ကြရာ ဆုရအားကစားသမားများ နှင့် အသင်း ခေါင်းဆောင်များ က လက်ခံရယူခဲ့ကြသည်။

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးဖလား ဌာနပေါင်းစုံ ကြက်တောင်ရိုက်အားကစားပြိုင်ပွဲ ကို ဩဂုတ်လ(၉)ရက်မှ (၁၂)ရက်နေ့အထိ (၄)ရက်ကြာ ကျင်းပ ခဲ့ခြင်း ဖြစ်ပြီး ဦးစီးဌာနများ၊ တက္ကသိုလ်များ တွင် တာဝန်ထမ်းဆောင် လျက်ရှိကြသည့် နိုင်ငံ့ဝန်ထမ်းများ က သက်ဆိုင်ရာ ဌာနကိုယ်စားပြုအသင်းများအဖြစ် ပါဝင်ယှဉ်ပြိုင်ကြခြင်းဖြစ်ကာ အားကစားနှင့် ကာယ ပညာ ဦးစီးဌာန မှ အားကစားပညာရှင်များ က အကဲဖြတ်ဒိုင်များ အဖြစ် တာဝန်ယူဆောင်ရွက်ပေးခဲ့ကြ ခြင်းဖြစ်ကြောင်း၊ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနရှိ နိုင်ငံဝန်ထမ်းများ၏ ကိုယ်လက် ကျန်းမာကြံ့ခိုင်ရေး နှင့် စိတ်အပန်းပြေ ပျော်ရွှင် စေရေး တို့အတွက် ဝန်ထမ်းတိုင်း မိမိတို့ ဝါသနာပါရာ အားကစားနည်းများဖြင့် ပါဝင်ယှဉ်ပြိုင်နိုင်ရေး၊ ဌာနအချင်းချင်းအကြား စည်းလုံးညီညွတ်စွာ ပူးပေါင်း ဆောင်ရွက်မှု အားကောင်းလာစေရေးအတွက် အားကစားနည်းများအလိုက် ပြိုင်ပွဲများ ကျင်းပပေး လျက်ရှိကြောင်း သတင်းရရှိသည်။