နယ်သတင်းများ သတင်းကဏ္ဍ

နတ်လူထိပ်ပန် နည်းပညာပြန့်ပွားရေးစင်တာ၌ ရေစုဆောင်းခြင်းနှင့် ရေချွေတာသုံးစွဲခြင်း နည်းပညာသင်တန်း ကျင်းပ

တောင်သူပညာပေးဝန်ထမ်းများ၏ စွမ်းဆောင်ရည်မြှင့်တင်ပေးရန် အတွက် ရေဆင်းစိုက်ပျိုးရေးသုတေသနဦးစီးဌာနမှ ပညာရှင်များပူးပေါင်းသင်ကြားပေးမည့် “ရေစုဆောင်းခြင်းနှင့် ရေချွေတာသုံးစွဲခြင်းနည်းပညာ (Water Harvesting and Water Saving Technology )သင်တန်း” ကို စစ်ကိုင်းတိုင်းဒေသကြီး၊ မုံရွာမြို့နယ်၊ စိုက်ပျိုး ရေးဦးစီးဌာန၊ နတ်လူထိပ်ပန် နည်းပညာပြန့်ပွားရေးစင်တာ၌ ဇူလိုင်လ ၃၀ရက်နေ့ နေ့လည် (၁)နာရီခွဲအချိန်က ကျင်းပပြုလုပ်ခဲ့သည်။

သင်တန်းဖွင့်ပွဲအခမ်းအနားတွင် တိုင်းဒေသကြီးလွှတ်တော်ကိုယ်စားလှယ် ဒေါ်အမာကြည် ၊ ဒေါ်အောင်ကြည် နှင့် ဒုတိယတိုင်းဒေသကြီးဦးစီးမှူး ဦးထွန်းရှိန် တို့က နှုတ်ခွန်းဆက်အမှာစကားများ ပြောကြားခဲ့ကြသည်။

သင်တန်းတွင် ရေဆင်းစိုက်ပျိုးရေးသုတေသနဦးစီးဌာန၊ ဒေါက်တာခင်မာဌေး က စိုက်ပျိုးရေကို ချွေတာသုံးစွဲသည့် စိုက်ပျိုးနည်းစနစ်(Water Saving Technology) နည်းပညာကိုလည်းကောင်း၊ လက်ထောက်သုတေသနအရာရှိ ဒေါ်သင်းမာချိုနှင့် လက်ထောက်သုတေ သနအရာရှိ ဦးကျော်မြိုင် တို့က စိုက်ပျိုးရေအရည်အသွေးဆိုင်ရာသိကောင်းစရာ(Irrigation Water Quality)နှင့် စပါးသားတက်ဆင့်ပွား စိုက်ပျိုးနည်းပညာ (New Rice Ratooning Technology)တို့ကိုလည်းကောင်း ပို့ချဆွေးနွေးခဲ့ကြသည်။

ထို့နောက် စစ်ကိုင်းတိုင်းဒေသကြီး စိုက်ပျိုးရေးဦးစီးဌာန တိုင်းဒေသကြီးဦးစီးမှူးရုံး မှ ဒေါက်တာတင်မာမာဦး က သင်တန်းပို့ချပေးပါသော ပညာရှင်များအတွက် အမှတ်တရ လက်ဆောင်ပစ္စည်းများ ဂုဏ်ပြုပေးအပ်ခဲ့သည်။
ဝန်ထမ်းများအနေဖြင့် သင်တန်းမှပို့ချလိုက်သော နည်းပညာနှင့်အတွေ့အကြုံများကို လေ့လာမှတ်သားပြီး မိမိတို့ တာဝန်ကျဒေသရှိ တောင်သူများအား ရေစုဆောင်းခြင်းနည်းပညာများနှင့် စုဆောင်းရရှိထားသော ရေများကို သီးနှံစိုက်ခင်းများတွင် စနစ်တကျ အကျိုးရှိရှိ ချွေတာသုံးစွဲနည်းများကို ပြန်လည်ဖြန့်ဝေပေးနိုင်ရန် ရည်ရွယ်၍ ဖွင့်လှစ်သော T o T သင်တန်းဖြစ်ကြောင်း ဒုတိယတိုင်းဒေသကြီးဦးစီးမှူး ဦးထွန်းရှိန် က ပြောသည်။

လတ်တလော ပြောင်းလဲသက်ရောက်လာလျက်ရှိသည့် ရာသီဥတု ကြောင့် ဆည်များရေအဝင်နည်းပါးမှုနှင့်အတူ စိုက်ပျိုးရေပေးဝေမှုလည်း လျော့ကျလာမည်ဖြစ်ရာ ရေစုဆောင်းခြင်း ၊ ရေချွေတာသုံးစွဲခြင်း နည်းပညာများသည် တောင်သူ့အတွက် အကျိုးများစွာရှိစေမည်ဖြစ်သည်။

အဆိုပါသင်တန်း သို့ စစ်ကိုင်းတိုင်းဒေသကြီးဦးစီးမှူးရုံးမှ စိုက်ပျိုးပညာပေးဝန်ထမ်း များနှင့် မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ ခရိုင်မြေ/မျိုး/ပိုး တာဝန်ခံများ၊ မုံရွာခရိုင်အတွင်းရှိ မြို့နယ်များမှ မြို့နယ်ဦးစီးမှူးများနှင့် စိုက်ပျိုးပညာပေးဝန်ထမ်းများ စုစုပေါင်း ၆၀ ဦး တို့တက်ရောက်လေ့လာခဲ့ကြကြောင်း သတင်းရရှိသည်။

Comments are closed.